កម្មវិធីពង្រឹងសិទ្ធិអំណាចយុវជនដើម្បីសមធម៌សង្គម (EYES) ជួយឱ្យយុវជនមានសមត្ថភាពប្រើប្រាស់សិទ្ធិពលរដ្ឋ និងនយោបាយរបស់ខ្លួនក្នុងភាពជាពលរដ្ឋដែលមានការទទួលខុសត្រូវ។ ដើម្បីសម្រេចគោលបំណងនេះ យុវជនចាំបាច់ត្រូវចូលរួមរៀនសូត្រទាំងទ្រឹស្តី និងការអនុវត្តជាក់ស្តែងក្នុងគម្រោងសំខាន់ពីរគឺ គម្រោងការអប់រំសិទ្ធិពលរដ្ឋ និងនយោបាយសម្រាប់យុវជន (CPREY) និងគម្រោង ការចូលរួមរបស់យុវជនក្នុងការកសាងសន្តិភាព និងការផ្សះផ្សាសម្រាប់ យុវជន (PBREY)។ តាមរយៈសកម្មភាពនានារបស់គម្រោងទាំងពីរ យុវជនបានរៀនសូត្រជាច្រើនអំពីតថភាពពិតដែលបាននឹងកំពុងកើតមានឡើងក្នុងសហគមន៍ ជាពិសេសតំបន់ដែលកំពុងទទួលរងផលប៉ះពាល់ពីគ្រប់ទម្រង់នៃការអភិវឌ្ឍ និងការគ្រប់គ្រងរដ្ឋ។ លើសពីនេះទៅទៀត កម្មវិធី EYES បានបណ្តុះនូវសីលធម៌រស់នៅ និងក្រមសីលធម៌វិជ្ជាជីវៈដល់យុវជន ដោយបងើ្កតបរិយាកាសអំណោយផលសម្រាប់ការអប់រំដល់ពួកគេឱ្យមានមនសិកា ចេះឈឺឆ្អាលពីបញ្ហាសង្គម។
CPREY
PBREY
គម្រោង CPREY បង្កីតឡើងដើម្បីបង្កើនសមត្ថភាពផ្ទាល់ខ្លួន និងការយល់ដឹងអំពីបញ្ហាសង្គមរបស់យុវជនតាមរយៈការចូលរួមវគ្គបណ្តុះបណ្តាលស្តីពីការអភិវឌ្ឍខ្លួនឯង សិក្ខាសាលាស្តីពីអភិបាលកិច្ចប្រជាធិបតេយ្យ និងភាពជាពលរដ្ឋសកម្ម វេទិកាសាធារណៈនានា កិច្ចសន្ទនាអន្តរជំនាន់ជាមួយចាស់ព្រឹទ្ធាចារ្យដែលមានបទពិសោធន៍អំពីកិច្ចការសង្គម និងដំណើរទស្សនកិច្ចសិក្សាទៅកាន់តំបន់ដែលកំពុងរងផលប៉ះពាល់ផ្សេងៗនៅតាមសហគមន៍។
គម្រោង PBREY បង្កើតឡើងដើម្បីបង្កើនសមត្ថភាពយុវជន និងបណ្តុះនូវសីលធម៌រស់នៅ និងក្រមសីលធម៌វិជ្ជាជីវៈដល់ពួកគេក្នុងការដោះស្រាបបញ្ហាដោយសន្តិវិធី តាមរយៈការចូលរួមវគ្គសិក្ខាសាលាស្តីពីការបំប្លែង និងដោះស្រាយទំនាស់ វគ្គអហិង្សាសកម្ម វគ្គការកសាងសន្តិភាពអន្តរ-ជាតិពន្ធុ និងអន្តរជំនឿ និងវគ្គការយល់ដឹងពីប្រវត្តិសាស្រ្ត និងការផ្សះផ្សា ដោយដកស្រង់បទពិសោធន៍សំខាន់ៗនៃប្រវត្តិសាស្រ្តអតីកាលរបស់កម្ពុជាមកធ្វើការឆ្លុះបញ្ចាំងរៀនសូត្រ ក៏ដូចជាបទពិសោធន៍នៃការកសាងសន្តិភាពនានាទាំងក្នុងប្រទេស និងក្នុងតំបន់។